| Չեխիայի ֆուտբոլի ասոցիացիան տուգանել է հավաքականի ֆուտբոլիստներին, քանի որ վերջիններս անվայել կերպով են տոնել «Եվրո-2012»-ում իրենց հայտնվելը, հաղորդում է Associated Press-ը։ Ասոցիացիան կարծում է, որ նման պահվածքը հարիր չէ ֆուտբոլիստներին։ Այժմ թիմը ստիպված է 2 մլն կրոն վճարել (106,5 հազար դոլար)։
Նոյեմբերի 15-ին չեխերը «Եվրո-2012»-ի անցումնային խաղում հաղթել էին Մոնտենեգրոյին՝ 1։0։ Եվ քանի որ առաջին խաղը ևս ավարտվել էր Չեխիայի հավաքականի հաղթանակով (2:0), այս թիմը դուրս է եկել եզրափակիչ փուլ։
Ինչպես տեղեկացնում է Չեխիայի ֆուտբոլի ասոցիացիան, օդանավակայանում ֆուտբոլիստները երգեր են երգել և վիրավորական արտահայտություններ հնչեցրել Չեխիայի հավաքականի նախկին ֆուտբոլիստ Ռադեկ Դռուլակի հասցեին, ով բազմիցս քննադատել է հավաքականը «Եվրո-2012»-ի ընտրական փուլում ցուցաբերած վատ ելույթների համար։
Թիմի նման պահվածքի համար ներողություն է խնդրել թիմի ավագ Տոմաշ Ռոսիցկին։ Նա հայտարարել է, որ ֆուտբոլիստները չափազանց ոգևորված են եղել հաղթանակը տոնելիս՝ չնկատելով, որ գտնվում են օդանավակայանում։ Ռոսիցկիի խոսքերով՝ նման պահվածքն անթույլատրելի է հասարակական վայրերում։
|
